Bio Off Imame Jaafar Saadiq R.A. Aur Aapki Mukhtsar Sawaneh (Tareekh)

www.aboutislam786.blogspot.com
Imam Jaafar Saafiq R.T.A.
Imame jaafar saadiq rahmatullah aleh ke name se fatiha dilai jaati hai 22 ya 15 rajab

Kuchh log 15 Aur kuchh 22 Rajab shreef ko Magar Kuchh Confuson Rehta hai iske bare me insha allah hum Next post me baat karenge iss se pehle chaliye hum jaante hain ki aakhir imame jaafar sadiq r.t.a. kon hai kya nisbat hai kahan paide hue or kis jagah aap ki mazaar hai kyunki kisi bhi shakhsiyat ke halaat position jaanna jaruri hai kyunki izzat aur mohabbat ki or ziyadah qadar kar saken 



AAPKA NAME IMAAM JAAFAR AL-SAADIQ RAHMATULLAH ALAHI HAi

AAPKE ALQAB SAR NAME

SAADIQ (TRUTHFULL) FAAZIL  (VIRTUOUS) TAAHIR (PURE)






Aap ki wilaadat 17 Rabi’ ul Awwal 83 Hijri (20 April 702 ISVi) ko Madeena me hui

Aap ke waalid ka naam Hazrat Imaam Muhammad al-Baaqir bin Imaam Zainul aabideen Ali al-Aswat  rahmatullāhi alaihi aur waalida ka naam Umme Farwah Fatima bint Hazrat Qaasim bin  Muhammad bin Abu Bakr Siddeeq rahmatullāhi alaihi hai.

Aap hussaini Saadaat hain
Aap ne apne daada Imaam Zainul aabideen aur waalid Imaam Muhammad al- Baaqir ke paas Quraan aur Hadees aur Tafseer ki taalim haasil ki
Aur Fiqh (Islamic jurisprudence), Falsafa (Philosophy), Ilm e kalaam (Theology) Ilm e riyaazi (Mathematics) Ilm e haiat wa falak (Astronomy) Ilme tashreeh (Anatomy), Ilm e keemiya (Alchemy) aur dusre uloom me maahir hue

Aap Masjid e Nabawi me taalim e deen karte the
Aap ne Tijaarat (commerce), Miras [Wirasat] (inheritance) aur Zakaat aur dusre bahut saare masaa'il ke baare me hal bataaye.

114 Hijri (733 A.D.) me aap ke waalid ke inteqaal ke baad 31 baras ki umr me aap Imaam bane
Aap Aa'imma e ahle bait ke chhathe (6th) Imaam hain

Aap ka ilm, husn e akhlaaq, sakhaawat, saadgi aur ibaadat mashhoor hai

Ek din kisi shakhs ki deenar ki thaili kho gai to us ne Hazrat Imaam Ja’afar Saadiq rahmatullāhi alaihi par shak karke iljaam lagate hue kaha ‘Meri thaili aap hi ne churai hai
Aap ne us se puchha ke Us me kitni raqam thi?
Us ne kaha 2000 deenaar Aap ne ghar me jaakar usko 2000 deenaar de diye.

Baad me jab us shakhs ko us ki khoi hui thaili kisi dusri jagah se mil gai
To us ne aakar pura qissa bayaan karke muafi maangi aur Aap se apni raqam waapas lene ki darkhaast ki
Magar aap ne farmaaya ke ‘Hum kisi ko dekar waapas nahi lete

Phir jab us ko logo se aap ka naam mubarak maaloom huwa to us ne behad nadaamat ka izhaar kiya

Ek baar aap ne apne khaadim ko kisi kaam se bheja. Us ko waapas aane me bahot zyada der ho gai to aap us ko talaash karne ke liye nikle. Thodi door jaane par aap ne dekha ke wo khaadim ek maqaam par so raha hai aur use paseena ho raha hai. Aap use pankhe se hawa karne lage. Kuchh der baad jab wo jaaga aur Imaam ko pankha karte dekhkar sharminda hua. Aap ne us se kaha ‘Ghabhrao nahi. Magar ek baat yaad rakhna ki din ke waqt me kaam karna chaahiye aur raat ke waqt me sona chaahiye

Ek baar aap ne besh qeemati libaas pehna to ye dekhkar ek shakhs ne aap se kaha ‘Aye aale Rasool, Itna qeemati libaas Ahle bait ko zeba nahi. Aap ne uska haath pakadkar aastin ke andar me rakha to us ne dekha ki aap ne niche taat jaisa khurdara libaas pehna tha.
Aap ne farmaaya Ye khalq ke liye hai aur wo khaaliq ke liye hai

Ek baar ek shakhs ne aap se puchha ‘Kya aap mujhe Rab ka deedaar kara sakte hain?’ Aap ne farmaaya Tum sooraj ke saamne lagaatar dekhte raho
Wo kehne laga Ye kaise mumkin hai? Aap ne farmaaya ‘Jab Rab ta’ala ki makhlooq Sooraj ko dekh nahi sakte to phir sab ke khaaliq ka deedar kaise kar sakoge


AQWAAL E IMAM JAAFAR AL SAADIQ R.T.A.

(1) Agar namaaz padhne se hum gunaah aur bure kaamo se baaz aa jaayen to ye samjho ki hamari namaaz qubool ho rahi hai.

(2) Agar tum izzat chaahte ho to Narmi ikhtiyaar karo aur agar zaleel hona chaahte ho Sakht bano.

(3) Ghussa har burai ki jad hai. Ghussa aqlmand insaan ko bhi barbaad kar deta hai.

(4) 3 nek amal Dunya me aur aakhirat me faa'ida dete hain :
Jis ne tumhare saath bura kiya ho use maaf kar do, Jo tumhen chhod gaya hai use milte raho aur jab tumhare saath jahaalat bhara bartav kiya jaaye to sabr karo.

 (5) Jo chala gaya hai (ganwa diya hai) us ke baare me lagaataar socha mat karo kyun ki us ke baare me sochna tumhare dimaag ko us (ke baare me sochne) se hata deta hai jo milne wala hai.

(6) Jo cheez ALLĀH ta’ala se hataakar dusri cheezon me mashgool kare un ko bagair kisi afsos ke tark karne ko Zohad kehte hain.

(7) Kisi neki ko maamooli na jaano, ke wo hi ALLĀH sub'hān wa ta’ala ki khushnudi ka ba'ees ho sakti ho.

(8) ALLĀH se agar kuchh maangna hai to Narm zubaan maango.

(9) Tama (laalach) insaan ko zaleel karti hai aur us ke yaqeen ko kharaab karti hai.

Karamate (magick) imame jaafar saadiq r.t.a.

Ek martaba aap Makkah me ek gali se guzar rahe the. Aap ne dekha ki ek aurat aur us ke bache ro rahe the aur qareeb me ek gaaye murda padi thi. Aap ne us aurat se puchha ki ‘Tum aur tumhare bache kyun ro rahe hain?’ Us ne kaha ‘Huzoor! Mera aur mere bacho ka guzaara is gaaye ke doodh par tha. Yeh mar gai hai aur hum isi pareshaani aur gham ki wajah se ro rahe hain.’ Aap ne farmaaya ‘Kya tum chaahti ho ki ALLĀH ta’ala tumhari gaaye ko zinda kar de?’ Aurat ne kaha ‘Mujh par museebat padi hai aur aap aisi baat kar rahe hain.’ Imaam Ja’afar Saadiq ne Dua farmaai aur apne qadam se gaaye ko ek thokar maari aur woh zinda hokar khadi ho gai. Phir Aap tashreef le gaye.

Aap ki 2 biwiyan aur 5 saahabzaade (Boys) aur 3 saahabzaadiya (girls) hain

(1) Bibi Faatima bint Hussain Asram bin Hasan Musanna se
2 bete – Ismāeel al-Arij aur Abdullāh al-Aftaah.

(2) Hameeda Khaatoon se
3 bete – Moosā al-Kaazim, Muhammad al-Dibaaj aur Ali al-Uraizi.
3 betiya – Faatima, Umme Farwah, Asma.

Aap ko Hazrat Imaam Mohammad al-Baaqir rahmatullāhi alaihi se ‘Alwi Husaini’ silsile ki aur Hazrat Qaasim bin Muhammad bin Abu Bakr Siddeeq rahmatullāhi alaihi se ‘Siddeeqi’ silsile ki Khilaafat mili hai.

Aapke Khalifa 

(1) Hazrat Imaam Moosā al-Kaazim rahmatullāhi alaihi,
(2) Hazrat Khwaja Baayazeed Bastami rahmatullāhi alaihi.

Aap ke shaagirdo me Imaam Abu Haneefa Nomaan ibn Saabit, Imaam Maalik bin Anas, Hazrat Sufyaan Sauri, Hazrat Jaabir ibn Hayyaan, Qaazi Sukuni aur Qaazi Abul Bakhtari mash'hoor hain.

Umayya khalifa Hishaam ibn Abdul Malik ki hukoomat ke dauraan zulm ke khilaaf jab logo ne baghaawat karne ka faisla kiya to aap ne un ko samjhaya ki jang ke ilaawa dusra raasta ho to pehle wo aajmana chahiye.
Logo ne khalifa banaane ke liye kaha to aap ne farmaaya ‘Mujhe hukoomat ki zaroorat nahi. Ye tamaam mulk ALLĀH ta’ala ka hai aur mere liye ye kaafi hai ki ALLĀH ta’ala ne mujhe izzat aur logo ke dilo par hukoomat ata farmai.’

Umayya hukoomat ke khilaaf awaam ki jung me aap ke chacha Hazrate Zaid, Yahyā ibne Zaid aur dusre kai rishtedaar aur azeez shaheed hue aur ba’az ko giraftaar karke saza di gai.

Is ke baad Hisham ne Imaam ko giraftaar karke Damishq me rakha.

132 Hijri (750 A.D.) me as-Saffah ne Marwaan ibn Muhammad ko haraakar Abbaasi hukoomat shuru ki.
as-Saffah Imaam ko  giraftaar karke nazar qaid karke rakha.

136 Hijri (754 A.D.) me al-Mansur baadshaah bana to us ne Saadaat se bughz ki wajah se aap ki mehfil aur taqreer par nazar rakhna shuru kiya aur logo ko aap se milne se rokne laga.
Phir Imaam ko giraftaar karke Samarra (Iraq) me nazar qaid karke rakha.
Phir kuchh arse baad aap ko Madeena laaya gaya.
Aakhir me al-Mansoor ke hukm se aap ko zeher diya gaya.

Aapka Wisal (deth) 15 Rajab 148 hijri (14 December 765 isvi ko hui
Aapka mazaar (maqbarah) jannatul Baqei Madinah shreef me hai

Allah ta’ala us ke Habeeb sallallāhu alaihi wa sallam ke sadqe me
Aur Hazrat Imaam Ja’afar al-Saadiq rahmatullāhi alaihi aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraadon ko sharfe qabuliyat ata farmae Ameen ya rabbal aalameen

Bio Off Imame Jaafar Saadiq R.A. Aur Aapki Mukhtsar Sawaneh (Tareekh) Bio Off Imame Jaafar Saadiq R.A. Aur Aapki Mukhtsar Sawaneh (Tareekh) Reviewed by shahadatsherani indian on 03:15:00 Rating: 5

1 comment:

  1. Hi salam dear readers kunde ki fatiha khawani 15 rajab hi ko karen insha allah next post fatiha kab or kay kya kaise kare ke bare me bataunga so plz wait some time insha allah

    ReplyDelete

Aapko ye post kaisi lgi ? Apni raay comments box me jarur de.or hmari honsla afzai kren.Aapki raay hmare liye keemti hai.

Powered by Blogger.