Qurbani Ke Masail wa Ahkam In Hindi Urdu Qurbani Karne Ka Tariqah 2016

Tag_Qurbani kya hai-fazail o masail-qurbani kyun karte hain- janwar kaisa hona chahiye-kis janwar ki kitni umar ho-kurbani kab aur kaise kare-kurbani ki duaa-

Qurbani Ke Masail Quraan w Hadees Ki Roshni Mein 
http://www.aboutislam786.blogspot.com
Janwar Zibah Karne ka Tariqah?
Makhsoos janwarun ko makhsoos dinun mein [zil-hajja-10-11-12-] allah ka qurb aur sawab ki niyat se zibah karna Qurbani hai yeh hazrat e Ibrahim A.S. ki sunnat hai aur hamare sardar mohammad e arabi s.a.w. ko iska hukam diya gaya Quraane pak mein irshad e khudawandi hai
                  فصل لربك وانحر _الكوثر
Tarjama-Kanzuliman- to tum apne rab ke liye namaz padho aur qurbani karo (Para30 surah kowsar)

Qurbani 1 aham mali ibadat bhi hai aur shuaar e islam se hai nabi e pak s.a.w. ne hijrat ke baad 10 saal tak madina e pak mein qayam farmaya aur har saal aapne qurbani ki jisse pata chala ki qurbani sirf makkah ke liye hi makhsoos nahi hai balki har uss shakhs ke liye hai jo malik e nisaab ho chahe kahin bhi ho uss par qurbani wajib hai [ Attention Please] munkareen e hadees ka name nihad musalman tola jo iss mali ibadat par Aitrazz karta hai ki isspar be inteha paisa kharch hota hai so iske bajay falahi umoor [kamyab kaam] for example. mohtajun ki madad shifa khana ya koi aur aise kam karne chahiye To yeh 1 bekaar ki baat hai becouse fir to hajj jaisi importent ibadat bhi jo islam ki nishaniyun mein se 1 hai isko bhi yeh kehkar khatam kiya ja sakta hai ki lakhun Rupey har saal hajj par kharch hote hain lihaza hajj ke bajay kamyab kaam karwaden to ziyadah sawab behtar hoga aur sirf yeh kehna ki qurbani hajj ke moqe par makkah hi mein ho sakti hai yeh Galat hai haan sirf hajj ki qurbani be shak makkah e muazamah hi ke sath khaas hai lekin Eid-Ul-Adhaa ki qurbani har malik e nisaab par wajib hai chahe woh kahin bhi ho 


Dunya Ki sabse Mehangi Qurbani Click ⤵

World Ki Sabse Mehngi Qurbani Read Must
Umrah Kaise Kare Tawaf Ahram Ka Tariqah

Qurbani Ahaadees Ki Roshni Mein 10 Beautifull Hadith 

1-Nabi e pak s.a.w. ne farmaya ki yomun nehhar 10 zulhajjah mein ibne aadam ka koi amal khuda ke nazdeek khoon bahane (qurbani karne) se ziyadah pyara nahi aur woh janwar qayamat ke din apne seeng baal aur khurun ke saath ayega qurbani ka khoon zameen par girne se pehle khuda ke nazdeek qubool hojata hai lihaza A imaan walo ise khush dili se karo (abu daood tirmizi ibne maja)
2-Sahaba e kiram ne arz ki ya rasulallah a.salam. yeh qurbaniyan kya hain? farmaya tumhare baap hazrat e ibrahim a.salam ki sunnat hai logun ne arz ki A allah ke rasool s.a.w. hamare liye isme kya sawab (benifits) hai farmaya har baal ke badle mein neki hai arz ki uoon ke bare mein kya hukam hai kaha uoon ke har baal ke badle neki hai(ibne maja) 
3-huzoor a.salam ne irshad farmaya jisne khush dili se talibe sawab hokar qurbani ki woh aatish e jahannum se rok diya jayega 
4-sarkar e do jahan s.a.w. farmate hain ki jiss mein wusa'at (auwqat) ho aur qurbani na kare woh hamari Eidgah ke qareeb hargizz na guzre allah ho akbar (ibne maja)
5-nabi e mukhtar a.salato wasalam ne farmaya jo paisa eid ke din kharch kiya gaya usse ziyadah koi paisa pyara nahi allah ke nazdeek(tibrani)
6-madine ke tajdar dono aalam ke mukhtar s.a.w. ne farmaya allah taala ki ibadat ke liye ashra e zilhajjah - yani eid se pehle ke 10 din- se behtar koi zamana nahi in mein 1 din ka roza ek saal ke barabar hai aur 1 raat ki ibadat shab e qadar ki ibadat ke barabar hai (tirmizi-ibne maja)
7-jab tum baqra eid ka chand dekho aur tum mein se koi qurbani karna chahe to usko chahiye ki baal mundane tarashwane aur nakhun katwane se ruka rahe (muslim)
8-hazrat e buridah r.a.se rivayat hai ki eid ul fitar ke din jab tak aap s.a.w. kuchh khaa na lete eidgag ko na jate aur eid ul adhaa ke din jab tak kuchh na khate jab tak namaz e eid na padh lete (tirmizi-ibne maja)
9-hazrat e abbas r.t.a. se ruvayat hai ki sarkar a.salam ne raat (night) mein qurbani karne se mana farmaya hai
10-imam e muslim ne ummul mominin hazrat e aayesga siddiqah r.anhuma se rivayat ki hai ki nabi e pak s.a.w. ne hukam farmaya seeng wala mendha laya jaye jo siyahi mein chalta ho siyahi mein bethta ho aur siyahi mein nazar karta ho matlab uske per pet aur aankhen siyah-black) ho chunanche mendha qurbani ke liye hazir kiya gaya huzoor a.salam ne farmaya aayesha chhuri lao fir kaha chhuri ko pathhar par tezz karo fir aap ne chhuri li aur mendhe ko litaya ayr zibah farmaya aur duaa farmai Ya Ilaahi to ise mohammad s a.w. ki aur unki aal w ummat ki taraf se qubool farma subhan allah kya baat hai mere sarkar ki 
Benefits :- hamare aaqa s.a.w. ka lutf e karam dekhiye ki aapne khud iss ummat e marhumah ki taraf se qurbani ki aur uss waqt bhi apni ummat ka khyal farmaya lihaza jo musalman sahib e istata'at ho aur ho sake ki woh sarware kainaat s.a.w. ke name ki qurbani kare to kya hi khush nasibi hai uss ke liye (bahare shariat qanoone sh.)

Qurbani Kis Kis Par Wajib Hai With Some Importent Masail 
qurbani wajib hone ke chand ahkaam 
1-islam-yani muslim par qurbani farz hai gair muslim par nahin
2-aqamat-muqeem hona musafir par qurbani farz nahi han musafir agar bator E nafal karega to sawab paega insha allah 
3-maaldar hona-malik e nisaab hona yahan maldar se murad wahi hai jiss par sadqa e fitar wajib hai woh murad nahi jis par zakat wajib hoti hai woh shakhs 52.5 sadhe bawan tola chandi ya 7.5 sone ka malik ho ya hajat e asliyah ke siva kisi aisi cheej ka malik ho jiski qimat 52.5 ya 7.5 tola ke barabar hai aur uss par qurbani wajib hai 
4-Baloog-na balig par wajib nahi haan agar kare to behtar hai agar koi shakhs balig ladkun ya biwi ki taraf se qurbani karna chahta hai to in se ijazat lena shart hai iske bagair wajib ada na hoga mard hona shart nahi balig auratun par bhi wajib hoti hai jiss tarah mard par hai 
5-Waqt-time ka paya jana matlab 10 zilhajja ko subah sadiq se 12th zilhajja ke guroobe aaftab tak hai yani 3 din 2 raaten in dinun ko qurbani ke din ya ayaamun nehhar kehte hain
Mas'ala- city ya shehar mein qurbani ki jay to shart yeh hai ki namaz e eid ke baad ho lihaza eid se pehle qurbani nahi ho sakti magar ganw dhani mein yeh shart nahi iss liye ganw dhani mein subah sadiq ke baad kar sakte hain kyun ki yahn namaz e eid nahi
Mas'ala- waqt se pehle qurbani nahi ho sakti agar kisi ne waqt se pehle ki to nahi hogi lihaza fir se qurbani karni padegi aur aise hi waqt guzarne ke baad bhi nahi ho sakti to ab qurbani ka janwar ya uski qimat sadqah kare 


Mas'ala- qurbani ke waqt me hi qurbani karna lazim hai koi dusri cheej uske badle nahi ki ja sakti jaise lakhun rupey sadqah kare to yeh kafi nahi  

Mas'ala- sharait ka pure waqt mein paya jana jaruri nahi balki qurbani ke liye jo waqt muqarar hai uske kisi hisse mein sharait ka paya jana wajib hone ke liye kafi hai jaise 1 aadmi pehle faqeer tha ab qurbani ke dinun mein maldar hogaya ya musafir tha muqeem hogaya non muslim tha ab musakman hogaya na balig tha ab baligg hogaya to in tamam suratun mein qurbani wajib hogi 

Qurbani Kis Janwar Ki Karni Chahiye? 

qurbani ke janwar 3 qisam ke hain uont gaay bakri ab har qisam me jitni noen qismein hongi woh sab shamil hain nar madah khassi sab ka 1 hi hukam hai yani sab ki qurbani ho sakti hai bhens aur bel gaay mein bhedh aur dumba bakri mein shumar honge

Qurbani Ke Janwarun Ki Umar Kitni Honi Chahiye?

janwarun ki umar yeh honi chahiye 
Uont-5 eyers
Gaay-2 eyers
Bakra/bakri-1 eyers
isse kam umar ho to qurbani jaiz nahi haan ziyadah ho to koi mushkil nahi balki afzal hai magar dumba ya bhedh ka 6 mah ka bacha agar itna mota ho ki door se dekhne mein saal bhar ka maloom ho to uski qurbani jaiz hai wallaho aalam bissawab

Kon Kon Se Janwarun Ki Qurbani Jaiz Nahi ?

Andha ho
Kana ho yani jiska kanapan zahir ho
Tihai se ziyadah nazar jati rahi ho
Lagar yani kamzor dubla ho jiski haddiyun mein magz gosht na ho 
Langda ho jo qurbani ki jagah tak apne paun se chalkar na ja sake 
Bimar ki uski bimari zahir ho 
Kan dum chaki tihai se ziyadah kate hon
Pedaishi kan na ho
Ek hi kan ho
Dant na ho
Than kate ho ya khushk ho
Naak kati ho 
Ilaaj ke zarye doodh khushk kardiya gaya ho
Khunsa janwar jisme nar madah dono ki nishaniyan pai jati hon
Woh janwar jo sirf galeez [kuda kachra] khata ho
Ek per kaat liya gaya ho
Junoon iss qadar ki charta bhi na ho 
Seeng meeng jiske jadh tak toot gae hon 

Kin Janwarun Ki Qurbani Jaiz Hai ?

Bhinga ho (jisko dubble dikhai de)
Jiski nazar tihai ya tihai se kam jati rahi ho
Jismein maamoli junoon ho yani char leta ho
Jise kharish ho magar mota ho 
Chiki dum ya kaan tihai ya tihai se kam kate hon kaan chhote ho
Khassi ho 
Bherh ya dumbe ki uoon kaatli gai ho 
Daaga huaa ho
Jiska doodh na utarta ho 
Gaay ya uoontni ka sirf 1 than ilaaj se khushk kiya gaya ho 
Langda janwar jo chalne mein langde paun se madad leta ho jiski chiki chhoti ho
Jiska seeng meeng se kam toota ho to in tamam suratun mein qurbani jaiz hai

Qurbani Ke Janwar Me Kitne Aadmi Shamil Ho Sakte Hain Aur Gosht Kaise Taksim Kare?

Gaay aur uoont mein 7 aadmi shamil ho sakte hain lekin shirka mein se agar kisi shareek ka hissa saatven se kam ho to kisi ki bhi qurbani nahi hogi haan saatven hisse se ziyadah ki ho sakti hai jaise gaay ya uoont ki 6-5-4 logun ki taraf se qurbani ho to ho sakta hai aur yeh bhi jaruri nahi ki sab ke hisse barabar hon magar yeh jaruri hai ki kisi ka hissa saatven se kam na ho
Gaay ya uoont  ke shirkat mein se koi 1 bhi kafir ya be deen ya bad mazhab ho ya un mein se kisi 1 ka maqsad qurbani nahi balki gosht lene se ho to ab aisi surat e haal mein kisi ki bhi qurbani nahi hogi qurbani mein jitne log shamil hai unki niyat taqarub ho matlab kisi ka iradah gosht hasil karna na ho lekin yeh jaruri nahi ki woh taqarub 1 hi qisam ka ho jaise sab qurbani karna chahte hain balki qurbani ke saath aqiqah ki bhi shirkat ho sakti hai ki aqiqah bhi taqarub ki 1 surat hai 
Shirkat mein qurbani hui to jaruri hai ki gosht wajan karke taqseem kiya jay sirf andaze se bantna sahi nahi kyun ki iss surat mein kisi ko kam ya ziyadah mile yeh na jaiz hai Aur yeh khayal karna ki kam ya ziyadah hoga to 1 dusre ko muaaf kardenge yeh bhi galat hai han albattah tamam hisse dar kisi 1 ko malik banade ki woh jise chahe gosht de aur jise chahe na de aur uske na dene se koi bhi shareek naraz bhi na ho to ab jaiz ho sakta hai aur taqseem ke liye wajan karna jaruri nahi hoga [waqarul-fatawa-jild4-p472]

Qurbani Ke Aham Aur Mutfarriq Masaile 
qurbani ke din guzar gay aur jiss par wajib thi usne na ki to qurbani fot hogai ab nahi kar sakta 

qurbani ke din guzar gay aur nahi ki aur janwar ya uski qimat bhi sadqah na kiya ab dusri baqra eid aagai ab yeh chahta hai ki pichhli qurbani ki qaza kare to bhi nahi kar sakta balki ab bhi yahi hukam hai ki uski qimat sadqah kare-aalamgiri-

jiss janwar ki qurbani wajib thi ayamun nahhar guzarne ke baad use bech dala to ab uss raqam ka sadqah karna wajib hai-aalamgiri-

qurbani karte waqt janwar kuda ya nacha ya uchhla jiski wajah se koi aib peda hogaya to iss surat mein qurbani hojaegi-durre mukhtar raddul mukhtar-

qurbani ka janwar mar jaye to maldar par lazim hai ki dusre janwar ki qurbani kare
han faqeer ya gareeb ke zimma dusra janwar wajib nahi 
qurbani ka janwar gum hogaya ya chori hogaya uski jagah dusra janwar kharid liya ab pehla janwar mil gaya to ab gani maldar ko ikhtiyar hai ki dono mein se jisko chahe uski qurbani kare magar han faqeer par lazim hai ki woh dono kare kyun ki faqeer ke zimma dusra janwar tha hi nahi ab agar dusra liya to isko bhi karega jabki maldar ne dusre janwar ki qurbani ki aur uski qimat pehle se kam hai to jitni kami hai to utni raqam ka sadqah karega han agar pehle wale janwar ko zibah karega to sadqah wajib nahi-durre mukhtar raddul mukhtar-

shirka [sath milkar qurbani karne wale] ne qurbani ke liye milkar gaay kharidi aur un mein se kisi 1 shareek ka intqaal hogaya  marhoom ke waarisun ne agar shirka se keh diya ki tum iss gaay ko apni aur uss ki taraf se qurbani karo aur unhon ne karli to jaiz hai agar bina ijazat e waris e shirka ke ki to ab kisi ki bhi qurbani nahi hogi-hadaya-

qurbani ke dinu mein kabhi bhi qurbani kar sakte hain magar raat mein makruh hai na pasandidah kaha gaya hai magar qurbani raat mein bhi ho jaygi-aalamgiri-

qurbani ka janwar musalman se hi zibah karwana chahiye agar kisi majusi[aag ka pujari] kafir hindu mushrik ya be deen ya murattad se qurbani ka janwar zibah karwaya to qurbani nahi hogi balki yeh janwar haram aur murdar hai-bahar e shariat-

qurbani ka gosht kafir hindu murattad ya be deen ko na den aur jo aadmi zibah karta hai usko bhi ujrat ke tor par nahi de sakta magar khushi se de sakta hai-bahar e shariat-

qurbani agar mannat ki hai to uska gosht na khud kha sakta hai na hi kisi maldar ko khila sakta hai balki uska sadqah kardena wajib hai agarche mannat mangne wala faqeer ya gareeb hi kyun na ho-bahar e shariat-

mayyat ki taraf se qurbani ki to uska gosht khud bhi kha sakta hai aur dusrun ko bhi de sakta hai magar mayyat marhoom ne wasiyyat ki ke meri taraf se qurbani kardena to iss surat mein khud nahi kha sakta balki pura gosht sadqah kare-raddul mukhtar-

qurbani ki khaal ya gosht qasai ko ujrat badle mein nahi de sakta-hadaya-

qurbani ki aur uske pet mein zindah bacha hai to use sadqah karden ya use bhi zibah karden agr bacha mara huaa hai to suko fenk den ki murdar hai magar yeh qurbani hojaygi-bahar e shariat-

dusre ne janwar zibah karwaya aur khud apna hath bhi chhuri par rakh diya ki donon ne milkar zibah kiya to donon par bismillah kehna wajib hai agar 1 ne bhi qasdan ya yeh khayal karke bismillah kehna chhodh diya ki dusre ne kehdiya mujhe kya jaruri hai to in 2no surat mein yeh janwar haram hogaya-durre mukhtar-


malik e nisaab ne qurbani ki mannat mani to uske zimah do qurbani wajib hai 1 gani hone ki dusri mannat ki-durre mukhtar-

qurbani ke janwar mein aqiqah ka hissa bhi liya ja sakta hai 

Note. aajkal log qurbani apne maa baap ya kisi marhoomin ki taraf se karwate hain jabki khud ki nahi karte balki yeh samajh bethte hain ki unki taraf se kardi apni bhi hogi yeh bilkul galat hai har malik e nisaab par har saal qurbani wajib hai agar aisa karega to gunehgar hoga jabki marhoom par farz nahi thi balki khud par thi to barae meharbani yeh baat aapne jaanli hai to dusrun ko bhi bataen allah aapko jazae khair ata farmega yeh jihalat hai isko khatam karen please 

Qurbani kaise karen Kurbani Ka Aasan Tarika W Duaa Hindi Urdu


http://www.aboutislam786.blogspot.com

Qurbani ka janwar upar batai gai shartun ke muwafiq ho aur un buraiyun se paak ho jinki wajah se qurbani na jaiz hoti hai aur janwar khubsurat mota tazah ho aur zibah se pehle use chara pani den yani bhoka pyasa zibah na kare aur 1 ke samne dusre ko zibah na kare aur pehle se chhuri tezz rakhen ab janwar ko left baen pehlu par iss tarah litaen ki muh uska qibla ki taraf ho aur apna right sidha per uske pehlu par rakh kar jald zibah kare aur pehle yeh duaa padhlen

[Inni waj hatu waj hiya lillazi fataras samawaati wal ard hanifan wma ana minal mushrikeen innas salaati w nusuki w mahyaya w mamaati lillah hi rabbil aalameen laa sharika lahu w bizalika umirtu w ana minal muslimeen]

Jab tak janwar thanda na hojay na haath per katen na khaal utaren agar qurbani apni taraf se ho to zibah ke bad yeh duaa padhe

Allah humma taqabbal minni kma taqabbalta min khalilika ibrahim alahis salam w habibika sayyadna mohammad sallal llaho alayhi wasallam

Agar dusre ki taraf se karni ho to minni-مني-ki jagah من min keh kar uska name le jiske name se qurbani karni ho 

Qurbani Ka Gosht Aur Khaal Ka Hukam Kisko Dena Chahiye?

behtar yeh hai ki gosht ke 3 hisse kare
1 hissa fuqra[gareeb] 
2 dost w ahbab w aqarib ke liye 
3 apne ghar walun ke liye 
qurbani ki khaal ko sadqah karde ya apne istemal mein bhi la sakta hai jaise musallah mashkiza etc. agar usko bech diya to uski raqam sadka karen 
madaris e islamiyan ya masjid mein dena jaiz hai balki afzal hai magar masjid ke imam ko tankhwah ke tor par dena jaiz nahi hai isi tarah zibah se pehle janwar ke baal ya doodh hasil karna makruh w mamnu hai aur qurbani ke janwar se nafa [benifits] hasil karna jaise sawari karna bojh laadna ya ujrat w kiraye par dena mana hai agar janwar ki uoon kaat li gai ho to usko bhi sadka  karden 

madaris e islamiyan ke nadir aur gareeb talba khalun ka behtreen masraf [khsrch] hai ki usmein sadqah ka bhi sawab hai aur ahya e deen ki khidmat bhi lekin usmen intihai ahtiyat ki zarurat hai ki aap jisko de rahe ho woh sunni sahi ul aqidah aur sath mein lene ke qabil bhi hon  aur be deen bad mazhab ko har gizz na den warna sawab to door aapke liye yahi wabal e iman ban sakta hai aur woh aapki qurbani ki khaal se aapke imaan ki khaal utardenge aur sadah loh sidhe musalmanun ko gumrah karne ka zarya banaenge wallaho aalam bissawab-

Halal Janwarun Ke Aazaa Ka Hukam 

Haram...behta huaa khoon 2 pittah 3 masana 4 peshab ki jagah 5 pakhane ki jagah 6 kapore 7 haram magz yeh chijen haram hai halal janwar mein 

Makruh-Chijen-Tilli aur gurdah 

Sunnat- kaleji bakri ka seena aur dast (haath) nabi e akram s,a,w, ko bahut pasand the

Hi my all dear readers i hope that this information rules of qurbani (qurbani ke masail o ahkam) very intresting for all if you like this post please share on social network facebook google twitter whatsapp
Thanks again for read complet my post 
Do't forget like my page All about islam 786 & follow me 
Qurbani Ke Masail wa Ahkam In Hindi Urdu Qurbani Karne Ka Tariqah 2016 Qurbani Ke Masail wa Ahkam In Hindi Urdu Qurbani Karne Ka Tariqah 2016 Reviewed by shahadatsherani indian on 11:10:00 Rating: 5

1 comment:

Aapko ye post kaisi lgi ? Apni raay comments box me jarur de.or hmari honsla afzai kren.Aapki raay hmare liye keemti hai.

Powered by Blogger.